Með tímanum hefur búið vaxið og dafnað en áherslur og áskoranir í landbúnaði hafa auðvitað breyst með árunum. Umhverfismál eru þar veigamikill þáttur.
Hönnun á nýju fjósi fór af stað árið 2012 svo hægt væri að hýsa allan kúaflotann undir einu þaki. Vinna við bygginguna hófst í júlí 2016 og í desember 2018 var nýja fjósið tekið í notkun en í því eru nú um 240 mjólkurkýr. Fjósið í Gunnbjarnarholti er 4.200 m2 að stærð, fullkomið fjós með ýmsum nýjungum, þ.á m. fjórum mjaltaþjónum.
Vinnuaðstaða fyrir skepnur og fólk er öll afbragðs góð í fjósinu og skapa þannig bestu skilyrði til að framleiða þar gæðamjólk.
Allt gert til að kúnum líði vel og að atlæti þeirra sé sem best. Fjósið er lausagöngufjós þannig að þær ganga frjálsar um, fara í mjaltir í mjaltaþjóni þegar þær vilja og þörfin kallar og þær hafa greiðan aðgang að fóðri og vatni með sjálfvirkum búnaði. Sjálfvirkni er nýtt eftir föngum í fjósinu og loftgæði, birta og önnur skilyrði til fyrirmyndar.
Sex mismunandi gerðir af dýnum eru í boði fyrir þær til að leggjast á. Þar af eru tvær gerðir af vatnsdýnum sem kýrnar kunna augljóslega vel að meta því þær dýnur eru alla jafna ásetnar.